es isch en dunstig abig in marrakech. dezember 23.
im café clock isch storytelling abig.
sobaldi das gläse han, isch klar gsi, da wotti hi. d moana chunt mit.

zersch wird uf darija, s marokkanische arabisch, verzellt, dänn di gliich gschicht uf änglish. bi beidne variante und allne 3 erzählende mensche hangi fasziniert adä lippe, de klang vom arabische dialekt ziehtmi unglaublich a, min chopf verstaht keis einzigs wort, mis herz isch wiit offä.

gits storytelling au idä schwiiz? frägt er nachem gschichtäverzellä.
hm… ja… aso… bi eus wirds wort vorallem sit es paar jahr im marketing brucht.
mir händ scho saagä und märli…
ich stammle irgendöpis zäme, ich weiss im fall gar nöd so rächt wie das bi eus eigentli isch. weisches du? was hetsch du gseit? weisch bscheid übers gschichtäverzellä idä schwiiz?

aso gschichte sind wichtig für mänsche, das isch klar. susch würemer nöd so abfahre uf podcasts, netflix, instagram und massemediä blabla.
aber händ mir sone tradition idä schwiiz?

d moana seit:
aso mini mama und min papa händ mir scho immer gschichte verzellt, und au selber usegfundni, und ich has immer no gern und cha au selber guet gschichte erfinde, wo anderi über mini phantasie stuuned.

ich han dänn d zurich storytellers im netz gfunde und bi scho ganz begeisteret gsi.
bi jetzt aber namal ganz andersch fündig worde und zwar bidä
schwiizerischä märligsellschaft:
Schweizerische
Märchengesellschaft
SMG

und lueg, das video ischmer vom eintä erzähler empfohlä worde und verzellt vodä marrokanische tradition vom gschichtä verzellä: